I Gusti Madé Sutjaja

Yaning alih-alihang di dedaaran, yaning tusing ada rasa, apa ké ento rasa pakeh, rasa manis, rasa lalah, wiadin tusing ada rasa apa-apanan di layahé wiadin di kenehé, lantas kasengguh dedaarané ento campah. Dadiannya, tusing dogén dedaarané, apa-apanan ané tusing karasayang tuara ngelah rasa tusing buungang apa-apanané ento kasambatang campah wiadin tusing nyiriang rasa. Kéto panampéné yaning mesuang apa-apanan, dedaaran wiadin ragragan, dija-dijanan uli nguni nganti jani.

Yan campahé suba mranén, bangkung mapalu bakalan kasambatang nudut keneh wiadin rasa. Tegarang jani uratiang pabligbagan anak truna-truna buka janiné indik panampén lampah di kapetengané. I pidan satua-satua di kapetengané wiadin panéstiané ento anak pingit wiadin singid pesan. Yaning ngortaang satua buka kéto anak liunan anaké makisi-kisi. Jani kisi-kisiné anak suba kagentiin aji kisi-kisi jaran; dadi masi orahang goah-goah wiadin cegak-cegik. Buka kakéné ortané ané neked ajak tiang.

Dugas timpal tiangé nyambatang ia lakar ngalih jangu lakar anggona ngulah léak, pisagan truna timpal tiangé ané sedek magubugan ajak timpal-timpalné masaut buka kéné.

“Bli, saja ké ada ané madan buka kéto? Yan saja, tegarang alihang tiang léak bajang lakar anggo tiang gagélan!” Ada masih ané masut buka kéné. “Béh, yan saja ada, bakalan mitrain tiang; lakar ajak ia malali ka pasar swalayan beliang sepatu tinjik.” Liu buin pasaut ané nyiriang campah-nyampahin ané nguni sanget kasingidang mapan ila-ila dahat yan ngraos tidong-tidong. Paminehé dugasé ento anak saja ngelidin sengkala yaning bani ngécéang lampah ané mapaiketan ajak panéstiané. Ngudiang dadi buka nyampahang bani mamunyi kakéto pakibeh laksanan truna-trunané jani yan ngindikang ané singid-singid? Pasaut ané anggona mélanin awak buka kakéné. “Tegerang resepang,” kéto buin imbuhina.

“Jani,” kéto ia nyumu pamélanné, "eda tiang anggona tindihan pabligbagan indik léaké. Tegarang kisidang tindihanné. Ané demen ngalaksanain laksana buka kéto di aab janiné anak tusing anak luh ané odah-odah buka ipidané. Anak bajang-bajang anak suba liu nglaksanain lampah buka kéto di janiné! Yan tiang jani kaik-kaik nyambatang dot kéné dot kéto ajak ia, pedas ia lakara demen ningehang sesambatané. Dong i raga saja meledanga baan trunané; buina karirihan nguniné akuina enu ada tur enu kalaksanayang. Just for fun, buka kéto pedas ané majalan di pamineh ané malaksana buka kéto.”

Mimih, lempuyeng tiang mara ningeh pasaut buka kakétoné. Sliwah tur singsal pesan ajak pamineh nguniné. Tondén pragat lempuyengé, lantas buin sambunga aji pasaut buka kéné.

“To, ngudiang dadi demen pesan stasiun tipiné nyiarang satua tur gambar-gambar indik lampah di kapetengané? Buina, ngudiang liu pesan anaké dadi kadutdut ngiwasin pilem indik panéstiané? Kasengguh koné rating-né dadi nincap pesan ulian ada dudunan buka kéto!”

Badah, nyak suba nyambung apa ané majalan di pamineh sang manonton ajak wang ané ngardi satua tur pilem buka kakétoné ulian i raga makejang enu pariidupé kaliput baan pariindikan mistiké. Lantas, yan enu buka kakéné kahanané, tusing patut munyi-munyi ané ada di arep kasengguh campah-manyampahang. Mapan, makejang ento anak anggona magonjakan wiadin maguyuan; basa-basan idup, koné. Satua di lemahé! Kénkén lantas satua di kapetengané?

Yaning saja tusing nyampahang tur saja wanéné katindihin, tusing ja lakar ada munyi-munyi buka kakéto ané pesu. Pedas suba di pamapag kajeng kliwoné ia lakar luas ka sema. Ditu ia lakara ngintip apa ané saja pesu wiadin ada di duur pangesengan sawané sawetara tengahing lemeng. Kéto koné pakibehé yaning dot nawang ané tusing campah. Lantas, enyén saja ané bani lakar kaik-kaik wiadin nyambatang kéné-kéto di sema dugas tengahing lemeng totonan? Saja wanén? Yan saja wanén, enyénan ké anaké ané wanén totonan? Eda pesan nyambatang anak ané madan I Nengah Jimbaran!