Olih Nyoman Manda


Sabilang tahun ajaran anyar pastika anaké pada gupuh pacang ngranjingang okané ka sekolah negeri. Yadiastun akéh naur sesidan-sidan pacang katrajangi krana pendidikan anak alit utami pisan. Ri sampuné polih genah ring sekolah negeri driki wénten karambang akidik antuk meled anak alit nembé ngranjing ring sekolah anyar. Sampun kauningan sareng sami wénten upacara murid anyar sané lumrah lan sampun taler wénten warah-warahnyané sané kasengguh MOS (masa orientasi siswa), alit-alité boya ja langsung ngranjing ka kelasnyané raris malajah. Nanging wénten galah tuntunan lan galah palawatan mangda siswa anyaré uning ring kahanan sekolah, guru, lan siswa sané kelihan (senior), mangda ten kagok lan likad patigrepé masuk sing nawang unduk.

Ri tepengan galah oriéntasi puniki, galah pamahbah ambah masuk ka sekolah anyar sampun wénten progran sekolah, OSIS sané nglaksanayang katuntun olih gurunnyané soang-soang. Ri panyobyahan indik sekolah anyar niki para siswa kelihan derik, polih galah nuntun arinnyané, siswa anyar mangda prasida ngingkingan déwék malampah padidi sing ja katulungin olih reramannyané sekadi ring jumah (biasané mangkin yan MOS anak tuané ané gupuh ngaliang kéné kéto apang sing okannyané nyeh).

Ring panyobyahan niki sampun wénten bibit galah maduluran geem para siswa kelihan ngorahin arin-arinnyané apang bisa mapayas padidi, bisa masocang pitu wiadin sia (ten sampun cara biasané), sing lek mapayung kukusan, ngandong kampil mareresik ring marginé mangda uning lan tatas nglaksanayang bersih natah lan palemahan. Sing dadi kliad-kliud, driki wénten ambah siswa kelihan nengkikin wiadin masebeng pedih apang siswa anyaré anteng makarya. Ngédéngang “geem” apang siswa anyaré takut, hormat, lan mesuang geem ngenyehin ri tatkala wénten acara siswa anyaré ngidih tanda tangan. Yén lebihan geemé naanin dumun orahin néngkléng, maguyang di tlabahé, wiadin di ebuké. Geem lebihan niki sampun sada mis akidik ngranayang di mani puané biasané yén dadi pemimpin suba ngelah bekel geem, apang bawahané hormat nyeh lan sing bani maklekisan. Budaya geem saking alit menawi dados budaya para pemimpiné lebihan geem apang hormatina. Geem ulih masolah ngaé-ngaé negehang sebeng, buyung sing nyidaang bani matinggah.

Menawi patut katlisik olih para guruné mangda siswané saking alit prasida malajah dados pemimpin sané ajér mabraya, nindihin laksana karya, mangda geemé metu wit karya sané kauningin sané tulus kalaksanang, sakadi baos mangkiné sané profésional boya ja pemimpin ngaé-ngaé geem krana tuna di karya lan laksana.

Pangujegan malajah dados nabdabang karya sakadi ngénterang palaksanaan MOS ring sekolah becik pisan katatarang anggé malajah dados pemimpin masa depan sané professional.